ما ضل حدا قلبو أبيض الا وانقلب ع قلبو وصار غير هيك..

بالشارع قال شاب لصديقه بانفعال: يا صرصور تعى شوف هالبنت شو سكسية؟
قال التاني: ولا هي عروس كمال..
قال الأول: ليش كمال تزوج؟
التاني: عم قلك عروس؟ فيه عنّا عروس قبل الزواج شي!
الأول: ليش عندو بيت؟
التاني: لا مستأجر. بعدين ليش لفتت نظرك هي شوف هون شوف هونيك..
الأول: الله يكثرهم ويضاعفهم بدنا نتزوج، واذا ما كترهم هالرب الطيّب ما حدا رح يقبل يتزوجنا طالما أنو ما عنّا شي.
بس أنو عروس كمال وحق هالشارع ورصيفو حلوة حلوة!!
التاني: اي طبيعي.. بنت ملاهي شو بدك منها وشو متوقع الا أنها تكون هيك..
الأول: عم قول وين ملاقى هالقالب!
التاني: ليش ناديتني صرصور؟
الأول: ما بتعرف؟؟ بهالأزمة وبين القتل والتدبيح والتقطيع والخطف ما ضل حدا قلبو أبيض الا الصرصور!
التاني: قصدك أني مدعوس وما فيني اتزوج.
الأول: عمى الهرمونات قتلتك، ماعد تشوف الا التخت! عم أحكي عن بلد وحصار وحرب علينا قريبة، وأنت مخك محصور بالنسوان؟
التاني: شو عرفك أنّي محصور؟ اذا ما أنت الصرصور بهالقرون الاستشعار يلي عندك. وين الحمامات العامة هون؟
الأول: أول حيط بيطلع قدامك!
التاني: هلأ كنت عم تبيع وطنيات.. جينا ع الجد فورا دليتني ع حيط من حيطان الوطن؟
الأول: يلا لساتك هون؟ روح خفف تركيز البول بمخك، وأنا رح احكي مع اسكندر يجيب سيارتو وياخدنا. بتعرف أنا عاطيه خمسين ليرة ليزمر عند المحل كل ما مرّ قدامو!